Jumat, 16 September 2011

Meuakai Buya (Hikayat)


Sebenarnya saya ingin menulis hikayat Aceh. Tapi sepertinya ini lebih cocok disebut pantun atau dalam bahasa Aceh dinamakan Hadih Maja. Banyak perbedaan pendapat tentang definisi dan rumus untuk menulis hikayat itu sendiri. Bagi saya menulis hikayat itu tidak mudah, namun bukan berarti tidak mungkin. Sampai saat ini saya masih belajar. Semoga tulisan berikut menjadi langkah awal. 
Meuakai Buya  

Munyoe tincue bhan tajak pane rôh
Meukiwiek-kiwiek meuputa laga
Bak nadum rakan saleum lôn peutroeh
Dak jeut ke judô meuligoe syiruga

Batek meulipat tajak tung lintô
Ngoen dara barô geupeudoeng gaya
Keu haderat Allah pujoe tahatô
Seulaweut ngoen saleum junjôngan ambiya

Si ôija krông tapaleit keu-ing
Si bak rukok ôn tapeudoeng dawa
Si krak haba bhông tanyoe ka teuhing
Si brang kasoe bungkôk Tuhan keuh hawa

Ubee na taloe takoeh ngoen sikien
Ta susôn rumoh ngoen batee bata
Keubit keuh gata get that na gatsien
Sep keuh pahla keugantoe hareuta

Tajak meudagang lam asoe kapai
Keu hase dudoe beuget tasaba
Kajeut neukira padum na pangkai
Bak Poetallah tapuwoe laba

Timphan meubalôt si asoe kaya
Meulaen mubee rijang tagantoe
Bek jeut keu hamba meuakai buya
Ban mandum sifeut Tuhan geugantoe

Oh ka tuha ôk pih ka puteh
Bacut talingkeu luka taratsa
Oh watee tajak meupalet beuteh
Oh watee ta eh lagee boh langa

Tip-tip bak kayee teunte na ukheu
Beupah ta puduek watee tapula
Ubee na jiôh geutanyoe lingkeu
Kulet bek tuwee wahe syedara

Bak uroe kurbeun talet keubeu kleut
Sitari-tari sue lagu si ticem pala
Kajeut ta piyôh bak but maksieut
Bek preh le Tuhan geupeutren bala

Bineh lampôh trieng timoh boh labu
Bineh lampôh u timoh boh pala
Bek rôh tagilhoe reusam endatu
Beu jeut keu ubat peunawa luka

Pade abeh thô nibak musem khueng
Ie krueng pih jilee u tungeh padang
Beu get tajaga brang kapue takheun
Udep bahgia kubu pih leumpang

Ranup lam cawan tabrie keu cut lem
Ranup lampuan tabrie keu raja
Tawoe bak rantoe gata beumalem
Beu ek meusahoe bak saboh banja

Gunong geulukeh bak ija katôn
Mameh takalon indah lagoina
Poma trep geupreh gata di dusôn
Ta mumat jaroe tacôm gaki ma

Meukumat ticak bak sagoe binteh
Pa’e ngoen ticak keubit tan saban
Beu gleh itikeut hate beu puteh
Nyan keuh hoe tawoe syiruga lapan

Mangat nyum ticem tabôh lam sôtô
Mangat nyum kulak tabôôn seukee
Kasep oh sinoe ulôn meututô
Ubee na silap meuah lôn lakee